Kabhi Tau Dikhlaao ChaaNd Chehraa! (Nazm)

[Atif Mirza]

KABHI TAU DIKHLAAO CHAAND CHEHRAA

Udaas lamHoN ki meethi yaadoN ko saath rehnay dau jaan-e-jaanaaN!
GhamoN ki talkhi ko khush dili say muji ko sehnay dau jaan-e-jaanaaN!
Guzartay lamHoN ko rok kar karo gi kia kuchh bataao mujh ko?
Yeh waqt tau aik behta darya hai, iss ko behnay dau jaan-e-jaanaaN!

Tumhi ko dekha, tumhi ko chahaa, tumhaiN hi dil maiN basaa liya hai
Meray liay ajnabi theeN pehlay, ab apnaa tum ko banaa liya hai
Kuchh aisay din maiN bitaa chukaa hooN keh khaali khaali theeN mairi aaNkhaiN
Ab inn kay pardoN kay peechay maiN nay tumhaaraa chehraa chupaa liya hai

Yeh zindagi hai azaab saari jo bin tumharay guzar rahi hai
Yeh bin tumharay guzar rahi hai, mujhay praishaan kar rahi hai
Tumhari Soorat hi mairi aaNkhoN kay saamnay jhilmilaa rahi hai
Tumhari yaadoN ki chaaNdni ab tau mairay dil maiN utar rahi hai

Meri umeedaiN aur aarzooaiN jo raNg laaieN tau kia bura hai?
Hamaray dil maiN khush ki kalyaaN o khil hi jaaieN tau kia bura hai?
Hai kia bura gar udaasiyoN ki khizaaiaN hum say rahaiN alaihadaa?
Hamari chaahat ki sar zameeN per bahaaraiN aaiaN tau kia bura hai?

Kabhi tau pooray hoN hum nay dekhay thay saath rehnay kay khwaab saaray
Kabhi Haqeeqat ki aab thehraiN jo saamnay haiN saraab saaray
Kabhi taSawwur ki sar-zameeN say nikal kay aao tau saamnay tum
Kabhi tau dikhlaao chaaNd chehraa, haTaao iss say Hijaab saaray

[Sania Sajjad]

Atif Sahib! Kamaal hunar wai se aap nazm ko batadreej saath le k chale hain. Aur nazm ko bil aakhir aik mantaqee anjaam tak ponchaya. Meri jaanib se dheron daad wasool kijiay.

[Bilal Mirza]

Bhai jan umda nazm hai, daad hazir hai taakheeri hi sahee.
Mazaa aa gaya.